هَم يضَحَّك .. ذكريات طبيب تكليف .. الحلقة الرابعة

ازيكم .. عاملين ايه
اكيد وحشتكم .. صح !?

مش قوي .. !!

يلا خير .. المهم اني وحشتكم

اكيد نسيتم اصلا احنا كنا بنتكلم عن ايه .. !!

هافكركم ..

ملخص الحلقات اللي فاتت .. كنت بحكي فيها عن الوحدة الصحية و اني بقيت مدير و لبست في الحيطة و عن شخصيات الوحدة تمريض و فنيين و عمال و اداريين .. و وصلنا لحد ما روحت بعد اول يوم شغل كئيب و بسمع علي الحجار "انكسر جوانا شئ" .. !!

و عشان الموضوع ميخرجش عن النسق اللي اتفقنا عليه في اول حلقة .. هكلمكم الحلقة دي عن العيانين و دماغهم العجيبة المريبة .. و كمان مواقف مينفعش ماتتحكيش

بغض النظر عن علي الحجار اللي لازمني طول المشوار من و الي الوحدة يوميا .. و بغض النظر عن الطريق الزفت و عن الوحدة الازفت .. كانت المفاجأة بالنسبة لي هي عقلية الكائنات - اللي هاطلق عليها وصف بشرية مجازا - في التعامل مع المرض .. خصوصا مع الاطفال .. !!

العيانين هناك 4 انواع

النوع الاول .. نوع مستكين و مسالم و هادي و بياتبر دكتور الوحدة اهم اختراع بعد الكهرباء و دة طبعا نوع مفيش منه خطورة و لا مشاكل .. و نوع تاخده علي حجرك و تدلع و تدادي و تكتب تجدعها قرصيتةن اسبرين و تبقي ملك زمانك و العيان يبقي ناقص يبوسك من بؤك كمان

النوع التاني .. دة اقل سلمية .. شكاك شويتين .. اسئلته كتير .. لحوح .. تحس انه مش مطمنلك او مستصغرك كدكتور .. و دماغك تورم من الكلام معاه .. و ممكن الكشف يدخل في ساعتين .. بس لو تشخيصك و علاجك ظبط معاه .. حاااااسب .. ايوة بقي .. احلي صينية مكرومة بشامل توصلك الوحدة مع زغاريد و طبل و زمر و تقعد باشا مستربع فوق المكتب لابس طرطورك و بالونتك في ايدك و بيفنوا حوليك حلقاتك برجالاتك .. و بالهنا و الشفا

النوع التالت .. و دة الغالبية العظمي .. بيتعامل مع الوحدة علي انها مرحاض عمومي .. و مكتبي هو لا مؤاخذة الكنيف .. يجي ي** في دماغ الدكتور كلام مالوش اي تلاتين لازمة و اعراض ملهاش اي علاقة ببعض .. بس عشان يوصلك انه عايز العلاج الفلاني لانه مبيرتحش الا عليه .. و اللي غالبا بيبقي اموكسيل المضاد الحيوي .. عشان يحطوه للبط و الفررخ .. و دة مع الوقت عرفتهم و حطتهم في البلاك ليست .. و انقلب السحر علي الساحر .. و بقوا هم الكنيف بتاعي

النوع الرابع .. و اخر نوع .. و اكتر نوع مثير للغثيان و القئ .. يعني اكشف من هنا و اضرب حبايتيت فلاجيل و واحدة موتينورم بعد الكشف .. عبارة عن كائنات هلامية رخوة جيلاتينية الملمس اشبه بالمخاط .. برابير يعني .. بيتعاملوا معايا ان انا ابن اختهم مثلا .. مفيش مانع اطلاقا يكلموني في اي شئ لو حتي مشكلة عائلية و ممكن يوسطوني احل المشكلة .. او حتي ياخدوا رأيي في لون اوضة النوم او جهاز العروسة .. عادي جدا

و قبل ما اكمل كلامي .. احب اوضح ان كلامي فوق مش تريقة علي اشخاص لا سمح الله .. دة تعليق علي عقلياتهم او بمعني ادق تعليق علي نظرتهم لطبيب الوحدة

بعد ما رصينا اصناف العيانين .. هندخل في مواقف عجيبة تعيد للاذهان ذكريات الدكتور العلامة دكتور ربيع طبيب اول و مدير الوحدة الصحية بالمزاريطة ..

و كل ما افتكر موقف هاكتبه ان شاء الله .. و الله المستعان

يعني للاسف هتخرج الحدوتة برة طور الحلقات .. و هتبقي سرد ذكريات .. يا رب متزهقوش بس

 

موقف 1 :

ام حمادة .. ست طيبة اوي .. جارتنا .. ساكنة جنب الوحدة لزق .. بتعتبر الوحدة هو سيتي ستارز بتاعها .. تدخل الصبحية متشيكة و لابسة الارطة .. 9 صباحا .. تطلع السلمتين . تهبط .. تعقد علي باب الوحدة ترغي مع ابلة غالية عن فلانة و علانة .. تاخد راحتها شوية و تكمل مشوارها جوا المول .. توصل عند المعمل كدة .. تهبط .. تريح شوية و ترغي مع ايناس و ابلة صفاء .. 11 صباحا .. !!

المهم علي 2 الظهر كدة تكون وصلت العيادة الفخيمة بتاعتي ..

حمد الله بالسلامة ..

- ازيك يا ام حمادة .. و ازي حمادة
- بخير يا دكتور اسلام .. ازيك انت و ازي امك
- بتسلم عليكي .. خير .. سلامتك
- والله يا دكتور .. انا كلي تاعبني .. عيني و بطني و وشي و رجلي و مخي و كعبي و بؤي و عايزة اقيس السكر و الضغط .. و عايزة فيتامينات و حاجة للمفاصل .. متعرفش دوا تخسيس حلو .. !!
- مممم .. شكلك ميكس بين صنف واحد و صنف تلاتة
- بتقول ايه يا دكتور .. !!
- و لا حاجة يا ام حمادة .. دراعك كدة نقيسلك الضفط .. شمري

ترفع الكم و تشمر .. اركب جهاز الضغط .. البس السماعة .. ابتدي قياس

تدخل نورا الممرضة ..
- ازيك يا ام حمادة .. انتي فين يا ولية
- ازيك يا بت يا نورا .. كنت عند ام صباح عشان فرح البت نوجة
- ليييه .. هي نوجا اتجوزت .. !!
- الواد سعيد بتاع السمك ..
- و صباااح الواااطية معزمتنيش .. وحياة ولادي ما ساكتالها .. بقي دة اسمه كلااام .. لاااا لااا .. دة الو*** رحتلها لما كانت عاملة عملية ال ..

- (انا مقاطعا) احم احم .. مش عارف اسمع يا نورا الضغط
- معلش يا دكتور .. علي العموم ربنا يهنيهم و خلاص .. اتوصي بأم حمادة يا دكتور .. دي تبعنا
- حاضر هكتبلها دوا من الحلو .. بس اتكلي انتي علي الله
- ضغطك فلة يا ام حمادة ..

و باستمر في تثبيت ام حمادة اللي كل ما اخلص من شكوي تطلع التانية .. و هكذا و هكذا لحد من نوصل لمربط الفرس .. اموكسيل مبرتحش غير عليه

و ساعتين من الجدال العلمي في محاولة اقناعها ان الامها المتعددة المتفرقة ملهاش علاقة بالمضاد الحيوي .. طبعا كلها تبوء بالفشل و برضخ لمطالبها في الاخر و بكتب اموكسيل شريط واحد .. امضاء طبيب اول الوحدة .. د اسلام التمامي ..

جامد اخر تلات اربع حاجات .. طبيب اول الوحدة .. يا سلااااام

خرجت زبونة الوحدة الدائمة تكمل رحلتها لخارج الوحدة .. و توصل عند بوابتها علي المغرب كدة بعد مشاورات و مناقشات كبيرة في موضوع ان سعيد بتاع السمك كان يستاهل حد احسن من نوجة بنت صباح .. !!

و زي ما قلتلكم قبل كدة ان الصنف دة هو غالبية العيانين اللي كنت بقابلهم في وحدتي العظيمة ..

كنت بصراحة ناوي اقفل الحلقة علي كدة المرة دي .. بس قولت هتبقي صغيرة .. فهاحكيلكم موقف كمان و هاعتبره زكاة عن صحتي و عفيتي

.. بس للعلم المواقف مش مرتبة زمنيا

 

موقف 2 :

كان اتفاقنا مع مدير الادارة ان طبعا فكرة تواجدي في الوحدة 24 ساعة كل يوم مستحيل .. و وصلت معاه انه انتدب دكتور كمان معايا في الوحدة هاحكيلكم عنه كتير بعدين لأنه من الكائنات النادر تواجدها علي ظهر كوكبنا العزيز .. و قسم الاسبوهع بيننا 3 ايام و 3 ايام .. و الجمعة مرة و مرة .. بس طبعا علي اساس اننا بنبات في الوحدة 24 ساعة .. و طبعا دة مكنش بيحصل ..

المهم ..

جه الدور عليا اني اشيل اول يوم جمعة .. صحيت متكدر طبعا .. لبست هدومي و نزلت .. شغلت علي الحجار كالعادة .. وصلت الوحدة بعد رحلة سفاري في وسط الطينة و المياة اللي بفعل المطر اللي موقفش بقاله يومين .. العربية اللي لونها احمر بقي لونها اسود .. المهم ركنت جوة جنينة الوحدة .. جبت خرطوم الجنينة و بدأت اغسلها ..

بلا شغل بلا هم .. العربية اهم يا عم ..

فتحت المياة و اقعدت انضف فبها شوية .. جاتلي ممرضة قعدت تشرحلي الوضع يوم الجمعة بيبقي صيدلية الوحدة مقفولة و ان الكشف بيبقي بفلوس ..

عينيا لمعت .. و قعدت احسبها .. و اقول ايوة بقي .. الكشف اعمله بخماشر عشييين جندي و يجيلي حنة و حنييين كشف .. عشة عشييين في حنة و حنييييين .. ياااا دين النبي .. الواحد هيلعب بالفلوس لعب يا جدع ..

رميت الخرطوم و دخلت جري .. بلا عربية بلا هم .. الشغل اهم يا عم .. الطب دة رسالة سامية .. !!

سامية و احمد .. !!

قعدت علي مكتبي في عيادتي .. معايا سماعتي و محفظتي في جيبي عايزها تتنفخ بقي .. و عمال اعد الثواني .. و عنيا الجوز علي الباب .. في انتظار العيانين .. و الملايين .. !!

ساعة .. اتنين .. الصلاة جت .. و خلصت .. ساعة اتنين ..

ولا الهوا .. مفيش كلب دخل يهوهو حتي في الوحدة و يمشي تاني .. حتي الجاموسة اللي كانت مربوطة في عمود الوحدة مشيت ..

احلامي بتنهااار .. يا رباااااااه ..

الغوث جه .. النجدة جت .. الله ااااااااكبر

سمعت صريييخ صريييييييييخ صريييييييخ من برة يا دكتووووووور يا دكتتتتور

انا قلت بس .. دي وش عملية قلب مفتوح و هاطلب فيها نص مليون و لا حاجة ..

و لقيت شاب داخل بيجري الحقني يا دكتور الحقني ..
- خير يا ابني .. ايه
- ابويا .. ابويا
- ماله
- قاطع النفس في البيت ..
- ايه
- تعالي معايا ونبي ..

خرجنا جري .. اول كشف خارجي في حياتي .. هتلعب يا ابو اسلام

وصلنا برة الوحدة ..

- يلا يا دكتور
- يلا فين .. !!
- ورايا
- وراك فين .. !!
- ورايا علي المكنة
- مكنة .. !!
- الموتوسيكل ..
- موتوسيكل ..
- يلا يا دكتور .. ابووووويا

موتوسيكل موتوسيكل .. نطيت ورا الراجل .. قفشت في ضهره .. و حاسس بالبراغيت علي المكنة زي ما بييسميها .. و رافع رجليا عشان الطين .. عدتي في ايدي .. لابس بالطو ابيض .. راكب مكنة صيني .. حلاق صحة وش و رايح اطاهر عيل مولود ..

وصلنا البيت .. مدخلناهوش ..
طلع يجري من جنبه و انا وراه ..
وصلنا لابوه ..

في الزريبة .. !!

ايوة .. ابوه مرمي في الزريبة .. وسط البهايم و حواليه ناس كتييير .. خير خيير اهو الدكتور وصل ..

بصيت لقيت الراجل وشه منور زي البدر .. اللهم صلي علي النبي .. قاعد و ساند ضهره في الحيطة .. و ماسك لي الشيشة في ايده .. و بيشد النفس ورا التاني .. و صحته احسن من صحة الجاموس اللي حواليه ..

اللهم لا حسد ..

- ما الراجل فل اهو يا هم ..
- والله يا دكتور كان قاطع النفس دلوقتي .. و شنقان .. و بيفيص
- بي ايه .. !!
- بيفيص .. !!
- طيب و بعدين ..

الراجل الكبير سلم عليا و قالن انه شنق بس و بقي فل و نفيس فيه حاجة .. حاولت اطمن عليه و اسأله كام سؤال اعمل فيها دكتور بقي .. و كام نصيحة حلوة من بتوع الشيشة عيب و حرام و كخ و الجو دة ..

و قلت اقيسله الضغط .. احلل المشوار .. لقيته عالي شوية و هو ماشي علي علاج ليه ..

نظرات الانبهار بيا بتلاحقني من اهله اللي محشورين جوة الزريبة .. اصله كان جهاز ضغط ديجيتال .. و طبعا بعد الجهاز دة ما ظهر اتشهرت في البلد بالدكتور اللي جاي من مصر عشان قلت اني شاريه من القاهرة ..

المهم نغس رحلة العودة وراه علي الموتوسيكل .. باجر اذيال الخيبة ..القلب المفتوح و النص المليون ضاعوا ..

يلا حصل خير .. تتعوض

وصلنا الوحدة نزلت من علي المكنة .. الراجل شكرني .. دخلت الوحدة .. دخل ورايا و لقيته مكرمش حاجة في ايديه و حطها في جيبي و طبطب عليه ..

حلاق صحة وش .. !!

فتحتها لقيتها خمسة جنيه .. مقطعة .. !!

جريت وراه و اصريت اني ارجعها بحجة قال ايه .. مباخدش فلوس .. انا معملتش حاجة دة واجبي و اهلي ..

خرج بالموتوسيكل بتاعه .. و انا في حوش الوحدة .. مدخلتهاش تاني .. قمت قالع البالطو و رميه جوة العربية .. ركبت و دورت .. و رزعت بابها .. بلعن في الطب و في اللي بيشتغلوه ..

يلا يا عم علي .. عكنن علي اللي خلفونا يا عم علي ..

و مشيت


خلصنا خلاص الحلقة .. و حكينا المواقف .. بس لسه فيه كتيير .. ما تقلقوش .. مواقف هتلاقيها بتتكرر مع كل دكتور تم تكليفه في وزارة الصحة المصرية في دولتنا الشامخة ..

افوتكم بعافية

Read More