هَم يضَحَّك .. ذكريات طبيب تكليف .. الحلقة الأولى

ازيكم يا جدعان .. عاملين ايه ..

بركة انكم بخير ..

نخش فى المفيد و من غير رغى كتير .. ﻷن اصلا الموضوع نفسه رغى كتير 

الحكاية بدأت من اكتر من 10 سنين لما قابولنا فى المدرسة بكرة هنملا استمارات الثانوية العامة و كل واحد يقرر عايز ادبى ولا علمى .. و هاتوا 4 صور و الجو دة.. !!

 

سامعك ياللى بتقول ياااااه انت لسة هتحكى من اول ثانوى .. !! .. اه هاحكى .. ليك شوق فى حاجة !! ..

المهم .. !!

طبعا روحت البيت و قبل ما اكمل كلامى كانوا هلى واخدين القرار بالنيابة عنى .. علمى علوم طبعا .. عشان نبقى دكتور .. و اعتبروا رأيى تحصيل حاصل .. يعنى مالوش لازمة .. و هوبا علمى علوم .. هوبا طب القاهرة .. هوبا السبع سنين خلصوا .. هوبا الامتياز خلص .. هوبا بقيت تكليف و طبيب وحدة صحية قد الدنيا  .. !!

شفت الانجاز يا برنس .. 10 سنين فاتوا هوا ازاى.. !!

 بس العشر سنين دول كوم و السنة التكليف دى كوم تانى خالص  ..

مبدأيا كدة .. تكليفى كان قى وحدة صحية فى مكان اسمه الناصرية .. قرية فى فارسكور دمياط .. متفرقش حاجة عن الوحدة الصحية فى المزاريطة   ..

و انا مكنتش افرق حاجة عن دكتور ربيع .. !!

 عشان منتهش من بعض .. و الاقكار متتهش منى هنقسم الحكاية على فقرات :

  ● المكان و وصفه

  ●التمريض و الاداريين فى الوحدة

  ●العيانين و دماغهم

 ●مواقف مينفعش متتحكاش

 ●انطباعى الشخصى عن السنة دى

و عشان برضه الموضوع ميبقاش ممل .. هاخليه على حلقات .. يطلعوا اتنين .. يطلعوا تلاتة .. يطلعوا عشرة .. انا و نصيبى بقى من الافكار و الذكريات اللى هافتكرها .. بس المهم متزهقزش

ندخل فى المفيد

 اولا : المكان و وصفه 

قبل ما احكيلكم عن المكان .. اقولكم ازاى وصلتله ..

بعد تقريبا شهر تنطيط عشان اخلص ورقى ما بين الجامعة و الكلية اللى اصلا برة الجامعة و فعليا فى محافظة تانية (جامعة القاهرة فى الجيزة و طب القصر العينى فى القاهرة) و ما بين الوزارة و النقابة و مكتب تراخيص العمل .. طلعت ورقى و خدته و روحت على المديرية و منها على الادارة و اللى قابلنى مديرها بابتسامة من الخد دة للخد دة و كأنى محمد الفاتح و راجع بعد فتح قسنطينيية ..

 و طبعا زى كل المصريين كنت مكلم كل الوسايط اللى اعرفها عشان اروح مكان عدل .. و بياناتى كانت عند المدير قبل ما اوصله .. و لما لقيت استقباله العظيم و ضبه المفشوخ على اخره بدأت اصوات طبول النصر ترن فى دماغى .. سلم عليا و مسكنى بايديه الاتنين من كتافى و قاللى خد يا بطل .. و ناولنى ورقى و قاللى رووح ..

قلتله يا دكتور انا يعنى كنت طمعان فى كرم حضرتك انى اروح مكان كو ..

قاطعنى .. كويس جدا جدا المكان دة .. روووووح يلا روووح

قلتله : اصل يا دكتور ..

قاللى : روووووح

كل كلامى كانت اجابته واحدة روووح روووووووح

قلت مبدهاش و توكلت على الله و عرفت منه الطريق .. 

و بدأت الرحلة .. !!          

الطريق ليها عبارة عن مدقات طوب و زلط و ساعات و طين . و احيانا اخرى روث بهايم ..

على الجانيين اراضى زراعية .. و يمكن لون الاراضى الاخضر هى الحاجة العدلة الوحيدة فى السنة دى .. !!

 احساسى و انا داخل البلد اول يوم و ماشى بالعربية هو هو نفس احساس داليا البحيرى و هى ماشية وسط الغفر مع هانى رمزى فى فيلم ( محامى خلع ) .. و احساس االى البد لما لقونى ركنت قدام الوحدة و عرفوا تنى الدكتور الجديد للوحدة (اللى مكنش فيها دكاترة اصلا ) هو هو نفس احساس الغفر لما العباية وقعت من على كتف داليا اليحيرى فى نفس الفيلم .. و ظهر الحق  .. !!

المكان عبارة عن قرية زى ما قلت شبه المزاريطة .. كبيرها اسمه الحاج ربيع مدين .. و من سنين علق يافطة على الوحدة الصحية و سماها وحدة مدين .. فردة كدة .. و ليه معرفش .. و اللذيذ ان الادارة كمان مشت وراها و بقى بيتكتب بين قوسين الوحدة الصحية بالناصرية (مدين) ..

و طبيعى جدا تلاقى واحدة بتجرى ورا شوية بط فى الشارع .. او واحد راكب حمار معفن و لابس جردل مقلوب فى دماغه و عامل فيها صلاح الدين و ماسك ايد المقشة و عاملها سيف ..

ماستغربتش بعد كدة لما كنت بلاقى مدير المدرسة اللى جنبنا قاعد قدام البوابة الصبح بيشرب شيشة ..

و ماستغربتش برضه لما لقيت جامسوة مربوطة فى باب الوحدة .. !!

ثانيا : التمريض و الاداريين

 دخلت الوحدة .. اول لحظاتى المهنية كطبيب .. و عمال افتكر كل حلقات دكتور هاوس و جريز اناتومى اللى شفتها .. و احلامى الوردية بتتحطم قدامى واحد ورا التانى .. و عمال ابص يمين و شمال فى الصحرا اللى انا دخلتها دى .. فين الوحدة .. فين الطب .. فين الاستقبال .. فين هاوس .. طيب بلاش .. فين شيبرد .. طيب فين  العيانين .. فين البشر .. !!

 و قلت السلام عليكم .. و محدش رد السلام

.. 

 ندهت تانى .. يا اهل الله ياللى هنا .، سلاااااااااامو عليكووووووووو .. !!

لقيت صوت جاى من بعيييييييييييييد .. من عند ركبى كدة : و عليكم السلام ..انت الدكتور الجديد .. !!

 ببص لقيت خير اللهم اجعله خير .. كائن بشرى طوله لا يتعدى نص متر لابس اسود فى اسود .. دققت النظر سوية كمان .. و الحمد لله قدرت احدد النوع .. انثى .. !!

انثى .. هزيلة .. قصيرة .. تحس انها خارجة من القبر بكفالة .. صوتها مش طالع اصلا .. وشها قد السمسمة .. مكنتش عارف هى اللى قاعدة على الكرسى ولا الكرسى اللى قاعد عليها .. !!

 و ماسكة دفتر قدها مرتين  و نضارة واكلة وشها كله .. و وسط سرحانى دة سألتنى تانى : انت الدكتور الجديد .. !! و قبل ما تسمع اجايتى على سؤالها  سألتنى سؤال تانى غير متوقع اطلاقا .. على الأقل بالنسبة ليا .. !!

هو انت خاطب .. !!

كفاية كدا فى الحلقة دى عشان متزهقوش منى .. و ناخد فاصل و نواصل
افوتكم بعافية .. و اشوفكم الحلقة الجاية مع بقية الشخصيات العجيبة اللى هتظهر فى الوحدة فى أول يوم ليا كطبيب بشرى .. !!

سلاموووو عليكوووووو

Read More