فبراير 2013 ~ مرار طافح

مساء الخير .. ازيكم .. بركة انكم بخير .. !!

بقالى كتير مكتبتش اى هطل من اللى بقرفكم بيه كل شوية .. دة اذا كنتم بتقرؤوا كلامى اصلا .. المهم انى مكتبتش من مدة عشان حال البلد ميسرش و مفيش كلام يوصف اللى بيجرا فيها ..

و عشان كدة قررت مكتبش عنها و لا اتكلم عنها .. و اعمل نفسى مش واخد بالى منها ..

بذمتكم مش كدة اريح .. !!

قصره .. قررت امبارح - و القرار كان فردى شخصى بدون اى ضغوطات خارجية و انا فى كامل قوايا العقلية - انى اتفرج على فيلم " امرأة هزت عرش مصر " .. !!!!!!!!!!

و اللى ميعرفش الفيلم .. مخسرش كتير .. بس للعلم بالشئ مش اكتر هاقوله ان الفيلم العظيم العجيب الرهيب مدمر كل الايرادات .. بطولة نجمة الجماهير - خير اللهم اجعله خير - نادية الجندى و الفنان الملهم فاروق الفيشاوى ..

و اللى بيسأل جوة نفسه : ليه عملت فى نفسك كدة يا اسلام !؟ .. احب اقوله .. دة قرار فردى اتحمل كل عواقبه بمفردى .. مس عشان ابويا الحج لازقنى جنبه على الكنبة .. قال ايه وحشته - مع انى فى وشه ليل نهار و كان لسة بيسبلى من شوية - .. و مش عشان لازم اتفرج على مزاجه و مش راضى يدينى الريموت - مع انه نص الفيلم كان نايم على نفسه و بيشخر - .. مش عشان حاجة من دول ابدا ابدا .. ابسوليوتلى .. !!

قرار فردى اتحمل كل عواقبه بمفردى .. !!

المهم .. ان في الفيلم دة اكتشفت حاجات كتييييييييير قوى عن تاريخنا المصرى الحديث .. رغم ان قراءاتى فى التاريخ المصرى العتيق و الحديث مش قليلة الا ان الفيلم دة اضاف ليا الكتير .. بل و صحح الكتير .. !!

يعنى مثلا .. اول مرة اعرف ان ثورة يوليو ١٩٥٢ .. (*) .. كانت بسبب امرأة سيئة السمعة .. !!

المزة دى - دة لو افترضت ان نادية الجندى انثى اساسا - كانت المفروض زوجة رئيس امن قصر الملك فاروق .. و بما انها مزة فدخلت دماغ الملك النسوانجى و عينها وصيفة الملكة و عاشوا مع بعض فى السوبيا .. و سابت جوزها عشان الملك اللى قلبها فى الاخر و اتجوز غيرها .. و سابها وصيفة زى ما هى و برضه لسة عايشين فى السوبيا عادى جدا .. و كانت تخلص السوبيا و تبكى على الاطلال و الملك و الحكم اللى ضاعوا منها .. !!

و اذ فجأة تتغير الاحداث .. و يدب الحقد و الغل و الكره فى قلبها تجاه الملك فاروق الخاين .. فقررت تشوف سوبيا تانية مع ضابط حيش معروف عنه كرهه للملك .. و تشتد السوبيا بينهم لحد ما تولع فى الدرة .. و تبدأ تقنعه بأنه لازم ينتقم من الملك و مصر هى امى و نيلها جوة دمى .. و تساعده فى منشورات الضباط الاحرار .. و كمان هى اللى رجعت انور السادات الجيش بعد البراءة لما اقنعت الملك انه يصدر فرمان يرجعه فيه الجيش فى احدى ليالى السوبيا بتاعتهم .. و هى كمان اللى انقذتهم لما اتقبض على مجموعة منهم فى مقر سرى ليهم بيطبعوا منشورات .. و هى كمان اللى قدمت معاد الثورة لما نبهتهم ان الملك عرف اساميهم و اصدر امر باعدامهم .. و هى كمان اللى ركبت القطر و الناس وقفت حواليه تهتف " تحيا الثورة " .. !!

يعنى تاريخ نصر الحديث بدأته امرأة سيئة السمعة .. !!

بغض النظر عن المحتوى السياسى فى الفيلم اللى طبعا بيحاول يُظهر الملك فاروق بالملك الخاين النسوانجى الفاشل - و كله بأوامر عليا - و بغض النظر عن محتوى مشاهد السوبيا فى الفيلم .. الا انى كإسلام اتبسطت .. مش عشان مشاهد السوبيا لا سمح الله .. بس عشان كمية المعلومات التاريخية العظيمة اللى استفدتها من الفيلم دة .. و مبكدبش لو قلت ان الفيلم دة فسر ليا حاجات كتير قوى مكنتش فاهمها ..

يعنى لما دولة تاريخها الحديث يبدأ عشان جسم واحدة مومس .. يبقى طبيعى جدا تاريخها المعاصر يكون فيه مرسي و بديع و شاطر و عريان .. و خرفان .. !!

بس السؤال هنا .. هل ممكن بعد ٥٠ سنة نلاقى فيلم يقول ان ثورة ٢٥ يناير اللى مات فيها اطهر شباب مصر بدأت عشان مزة كانت عايزة تتوب على ايد شيخ جامع و ضابط امن دولة منعها .. فقدرت تؤثر على دقون البلد انها تتطهر مصر من الكفرة الملاعين اعداء الدين .. و كله بما لا يخالف شرع الله .. !!

طيب هو هيبقى فيه سينما اصلا .. ولا السينما اصلا حرام .. !!

طيب احنا هنكون لسة موجودين و لا هنكون خلصنا خلاص .. مقتولين او قضاء و قدر .. !!

شفتوا بقى خليتونى اتكلم تانى عن البلد تانى ازاى .. مش اتفقنا ننساها و نسيبها فى اللى هيا فيه .. والله دى مكسورة الجناح و غلبانة قوى و محتاجة الدعاء .. ادعولها .. !!

و ادعوا للحسينى ابو ضيف و جيكا و كريستى و الجندى .. !!

صــوت الــشـهــدا يــقـولـك اصـــحـــى .. اســامـيـنـا فــي حبـات الـسـبحـة

عـــد صـوابـعــك عـلـي اســـامـيـنـا .. خـــــالـــد أحــمـد مــاجــد مــــيـنــا

شــهــدا يــغـنــوا شــهــدا يــطـيـروا .. شــهــدا اعــتـصـمـوا شــهـدا شـهـود

شــهــدا بــيـيـجــوا مـــن مـــاســبــيــرو .. و يـــزوروا مـــحـــمـــد مـــحـــمــود .. (**)

و اكتب على حيطة الزنزانة .. قتل الثوار عار و خيانة .. !! .. (***) .. يسقط يسقط حكم المرشد .. !!

كفاية هلس كدة .. افوتكم بعافية .. !!

________________________________________________

(*) .. دة لو اعتبرتها ثورة اساسا
(**) .. جزء من أغنية شهداء محمد محمود لفرقة اسكندريللا .. { أستمع الى الأغنية }
(***) .. جزء من اشهر هتافات ألتراس أهلاوى .. و دفع تمنها 74 من أطهر شباب مصر .. { استمع الى الهتاف }