شخابيط
شخابيط دي مجرد شخابيط .. بس شخابيطي انا و بس .. يعني افكار مش هتلاقيها
غير عندي انا و بس .. عشانها افكار اصلا مش موجودة او تقدر تقول مش افكار
من الأساس .. دي تخاريف .. منا اساسا عقلي تعبان .. مجنون بيشخبط شخابيط .. !!
يعني مثلا
حاولت اكتر من مرة
اكتب الموضوع دة .. مرة بالفصحى و مرة بالعامية و أعمل مقدمات طويلة عريضة
.. و اتخيل ناس فى زمن تانى غير زمننا .. و اعمل حوارات و افلام .. مع ان
الموضوع ابسط بكتير من كدة .. اللى عايز اقوله المرة دى برضه خيال .. خيالى
انا و بس .. شخابيط .. !!
مشهد
لميدان التحرير فى زمن منعرفوش و يوم منعرفوش .. و ليكن يوم ٢٥ يناير (*)
.. مئات الألاف جايين على الميدان من كل مكان فى مصر .. كاميرات التليفزيون
مرشقة فى كل حتة .. الخيم اتنصبت .. الأعلام اترفعت .. الاعتصام بدأ ..
الهتافات اشتغلت .. الالتراس بيزلزل كوبرى قصر النيل (**) .. منظر مهيب ..
الصوت بيرج مصر كلها .. الهتاف بأعلى صوت و لأخر نفس .. " الشعب يريد إسقاط
عديمى الأخلاق " .. !!
الشعب
عايز أخلاق .. يعنى لما واحد كتفه يخبطك و هو ماشى فى الشارع بالغلط يلف و
يبتسملك و يقولك آسف .. تبتسمله و تعديها .. أو لما واحد ياخد مكان ركنتك
ما تفضلش تشتم بأعلى صوتك فى الشارع كأنه غلط فى ذاتك الملكية .. حاجات
كلها بسيطة جدا جدا .. !!
ندخل فى التقيل بقى .. !!
يعنى
لما بنتك او اختك او مراتك تنزل يوم العيد - او اى يوم تانى - الشارع ..
تمشى و هى متطمنة و فى أمان .. مش قلقانة من واحد يعاكسها ولا واحد يتحرش
بيها ولا سواق تاكسى يفضل يلعبلها حواجبه فى المراية .. !!
يعنى
لما تختلف مع اخوك فى الرأى تسمع كلامه للأخر و لو اقتنعن بكلامه كان بها
.. و لو مقتنعش محصلش حاجة .. هو مغلطش فى البخارى يعنى .. عديها .. مش
لازم تشتمه و تتفه من رأيه و تقول عليه حمار .. !!
يعنى
لما ابنك ولا اخوك الصغير يروح يلعب هع اصحابه فى الشارع ولا النادى او
حتى الساحة الشعبية .. متبقاش قلقان ان نص اصحابه يكونوا شمامين او حشاشين
.. !!
يعنى
لما بنتك او مراتك تتأخر فى شغلها شوية .. تمشى فى الشارع و هى مطمنة ان
محدش من اللى ملقحين على القهاوى يبصلها بصة كدة ولا كدة .. او يقول ايه
مرجعها متأخر .. او يؤلف حكاية ليه معاها يثبت بيها للناس معاه انه سبع
البرومبة .. عشان بس اتأخرت فى شغلها شوية .. !!
يعنى ما تلاقيش واحد بيحشى سجاير فى بيته قدام مراته و عياله .. أو ميحشيش من أصله .. !!
يعنى متبصش من ورا الشيش على جارتك و هى بتنشر الغسيل .. عشان تخطفلك بصة على دراعها ولا صدرها .. !!
يعنى متلعنش اليوم اللى اتولدت فيه لما ابوك يقل مصروفك شوية .. !!
يعنى تخلى عندك دم و تشيل عن اهلك شوية .. !!
يعنى متمسكش مسمار و تمشى تعلم على عربيات الشارع واحدة واحدة .. !!
يعنى متبصش لغيرك و متكرهلوش الخير .. !!
يعنى متقضيش كل وقتك على النت تدور على القباحة .. !!
يعنى
تعرف ان زميلتك دى زى اختك .. متتكلمش عليها ولا تبص علي جسمها .. و لا
تلعب بيها .. و تبطا تريل قدام اى "ت" مربوطة .. كما تدين تدان يا أخى ..
!!
يعنى تبقى قد الأمانة .. و تبقى قد ثقة الناس فيك .. !!
يعنى متلومش الضحية .. !!
يعنى متنمش .. متغتابش .. متشتمش .. متخونش .. متكدبش ..متغشش .. متعاكسش .. متتحرشش .. متحششش .. متسكرش .. !!
يعنى خليك محترم .. !!
يعنى .... (***) ...
يمكن
فى زمن غير زمننا .. و دنيا غير دنيتنا .. الناس تروح التحرير فعلا .. و
اللى كتبته دة يبقى هتافات تزلزل مصر .. و نطالب الشعب - ولا استثنى نفسي -
بالأخلاق و الاحترام .. و نقف قدام عدسات الكاميرات نتكلم بالساعات عن
الاخلاق .. و نلاقى جرافيتى فى كل الشوارع بتقول خليك محترم خليك أخلاق ..
يمكن و يمكن لأ .. !!
يمكن
أكون بتخيل أو بحلم .. بس الحلم دة لازم يتحقق .. او على الأقل جزء منه ..
عشان بجد احنا بقينا - للأسف - مجتمع بايظ صايع حشاش .. مجتمع مقرف عايز
يتفجر .. مجتمع عديم الأخلاق .. !!
بس يا ترى هنعتصم كام يوم فى الميدان عشان الناس ترجع أخلاق تانى .. !!
____________________________________________________________
(*) بالعند فى كل كارهى ثورة شباب مصر .. ثورة 25 يناير
(**) بالعند برضه فى كل كارهى رجالة الألتراس .. و بالعند فى كل اللى أنكر دورهم فى الثورة
(***) اكتب الانتقاد اللى عايز توجهه لعديمى الاخلاق .. و هأضيفه الى شخابيطى "بإسمك"
