شخابيط
شخابيط دي مجرد شخابيط .. بس شخابيطي انا و بس .. يعني افكار مش هتلاقيها غير عندي انا و بس .. عشانها افكار اصلا مش موجودة او تقدر تقول مش افكار من الأساس .. دي تخاريف .. منا اساسا عقلي تعبان .. مجنون بيشخبط شخابيط .. !!
يعني مثلا
- فيه حد تشوفه مرة في حياتك .. و متنساهوش لاخر حياتك .. حتي و انت متعرفش عنه اي حاجة .. غير اسمه .. بس بتكون هي المرة .. صورته بتترسم في خيالك .. صوته ميفارقش ودانك .. حتي ريحة العطر بتاعه تفضل مرتبطة في ذهنك بيه .. بيه هو و بس .. و الدنيا تاخدكم و كل واحد يروح لحاله .. بس بتفضل فاكره .. و رغم انك متعرفش حاجة عنه غير اسمه ، بتكمل باقي حكايته من خيالك .. بتحطله شخصية و كاريزما و عقلية كلها من خيالك .. في النهاية بيكون انسان كامل في نظرك .. في خيالك .. !!
و يبقي حاجة كدة زي حبيبك الخيالي و ممكن تعتبره توأم روحك زي ما بنقول .. بس في الأخر بيفضل خيال .. مجرد خيال .. بتتكلم معاه في خيالك .. صورته علي طول قدامك .. تضحك معاه و تهزر معاه و ممكن كمان تخرج معاه .. في خيالك .. و كمان تشوفه شريك حياتك .. تتخيل مواقف و حكايات و يمكن كمان ذكريات معاه .. بس برضه في خيالك .. !! .. او حتي تزعل معاه .. !! .. و تفكر ازاي تصالحه .. !! .. و تصالحه في خيالك .. ساعتها بتشوف ضحكته قصاد عنيك كأنه قاعد قدامك بجد .. !! .. بتبقي اسعد لحظات حياتك ..
في خيالك .. !!
و لو الزمن رماه تاني في طريقك بتلاقي نفسك طاير من الفرحة ان عينك جت في عنيه مرة تانية .. و تجري عليه تناديه عشان تشوف خيالك قدامك لو مرة كمان في العمر .. بس برضه دة بيحصل في خيالك .. !! .. مبتجريش ولا بتتحرك .. بتتسمر قي مكانك و تبقي عايز عينك متتشالش من عليه ،، بس من بعيد لبعيد .. نفسك تشوف ابتسامته و تسمع ضحكته .. او تلمس ايديه .. بس بتفضل خايف ما يطلعش في خيالك حاجة حقيقة غير اسمه .. او خايف تلاقيه اصلا مش فاكرك .. !! .. هتفضل عايش في خيالك .. !!
حتي لو افتكرك .. و جالك .. سلم عليك .. و ندهلك باسمك .. كل اللي بتعمله ساعتها بترد السلام .. !! .. و بتاخد نفسك بعيد بعيد عنه و تخاف تقرب منه عشان صورته المثالية اللي انت راسمها في خيالك متتهزش .. و رغم انك عارف ان كل دة خيال هتفضل تعيش في خيالك مع حبيبك اللي رسمته .. و هتهرب منه رغم انه موجود قدام عنيك .. حقيقة مش في خيالك .. و كل اللي بينكم هيفضل السلام .. بس السلام .. !! .. اما الكلام .. كل الكلام بيبقي بس في خيالك .. !!
ساعتها هتلاقي نفسك .. نُصك بيضحك .. و التاني زعلان .. !!
شايفك مش مصدق كلامي .. !! .. حقك طبعا متصدقش .. ما هو دة مش كلام ناس عاقلين اصلا .. ولا دة كلام من الأساس .. دة خيال .. !! .. خيالي .. بشخبط .. شخابيط ..
شخابيطي انا و بس .. !!
