طبعا فيه ناس هتكفرنى بعد الكلام اللى هكتبه دلوقتى .. :))
اللى بيحصل عند السفارة الأمريكية دلوقتى و اللى حصل فى اليمن و فى ليبيا .. اسمه تخلف عقلى و غباء منقطع النظير
و محدش يقولى نصرة رسولنا و يتحمق عليا ..
اولا .. نصرة رسولنا تكون باتباع سنته و رسالته و اللى كلنا عارفين مفيش فيها اى حاجة من اللى بيحصل دلوقتى .. و لو ناسيين افكركم بـ " اذهبوا فأنتم الطلقاء " .. !!
ثانيا .. 95 % من اللى عند السفارة و عايشين دور البطولة فى مواجهة اعداء الله من رجال الداخلية - من وجهة نظرهم طبعا - ما شافوش ولا هيشوفوا الفيلم .. و لا يعرفوا اى حاجة عنه غير ان الشيخ الهمام ايو دقن طويلة و جلابية قصيرة قالهم اعملوا كدة .. !!
و على فكرة هما دول برضه نفس الناس اللى قالوا على نجيب محفوط كافر من غير ما يقرؤوا حرف ليه ولا حتى اولاد حارتنا .. !!
ثالثا .. مفيش خبر واحد على اى موقع اخبارى عالمى عن الفيلم و اعادة بثه .. !! .. كلها اخبار قديمة من سنين .. !!
و قبل ما تقول عليا كافر ولا متخاذل عن نصرة الرسول الكريم .. اللى فى رأيى المتواضع جدا . انه ازكى و اكرم و ارفع شأنا بكتييييييييييييييييييييييير جدا جدا من نصرته على الطريقة دى و شاكلة ابو دقن اللى بيحدف طوب على السفارة .. !!
و بعيدا بقى عن البؤين بتوع ان السفارة الأمريكية تعتبر تحت سيادة أمريكا و كدة احنا بنعاديها .. و هندخل بلادنا فى مشاكل ماحناش قدها .. اللى بيحصل قدام السفارة مش دين ولا أخلاق ولا حتى عقل و مفهومية .. !!
و قبل ما حد يسمعنى البؤين برضه بتوع انت دلوقتى بتهاجم التظاهر و بتدافع عن الداخلية عشان انت بتحب مرسى و متعاطف معاه .. هارجع و اقوله ان دة برضه كان رأيى زمان لما نفس الدقون دى راحت اقتحمت سفارة اسرائيل فى عز الثورة .. و برضه كان رأيى فى نفس الدقون اللى فى عز ثورتنا طلعلهم جناحات بترفرف و صدعونا بـ ؟ سلحونا سلحونا و علىغزة رحلونا " .. !!
أيها السادة الكرام - اللى بدقون - .. ديننا الاسلامى الحنيف مش طاقية و جلابية قصيرة و دقن .. ديننا مش نقتحم سفارة و نقتل سفير .. ديننا مش تغييب عقل و اتباع اى رأى لمجرد ان صاحب الرأى بدقن .. ديننا مش انتم .. و انتم مش ديننا .. !!
ديينا الإسلامى من تصرفاتكم برئ .. !!
و تانى للى ميعرفش و اللى مش عايز يعرف .. انا مسلم .. و اسمى اسلام .. و غيور على دينى .. و رسولى الكريم .. بس نصرته تكون باتباع سنته و رسالته و تكريمه و تعريف الناس بيه . زى ما حصل من جماعة " اكتشف الاسلام " فى لندن لما بدؤوا حملة تعريف بيه فى لندن .. و على هما كمان بدقون .. بس الفرق بينكم و بينهم الدماغ .. !!
و مجرد سؤال .. مين المستفيد من دفع المسلمين لمهاجمة سفارات امريكا فى يوم تم التعارف عليه دوليا - شئنا ام ابينا - بيوم للتعاطف مع شعب امريكا .. 11 سبتمبر .. !!
و خير الختام .. اللهم صل و سلم و بارك عليك يا سيدى يا رسول الله يا خير الانام و خاتم المرسلين
