نفس الشباب .. نفس المجلس .. نفس الاغبياء .. !!

نفس الشباب اللى نزل فى 2006 و لبس اسود و قالوا كفاية لمبارك و نظامه
هم نفس الشباب اللى نزلوا مع 6 ابريل فى مظاهرات مالهاش اول من اخر و برضه ضد مبارك و نظامه
هم نفس الشباب اللى دعوا ليوم 25 يناير
هم نفس الشباب اللى نزلوا يوم 25 يناير و اعتصموا فى 28 يناير
هم نفس الشباب اللى الاعلام القذر بتاعنا قال عليهم قلة مندسة و اجندات خارجية و ماجورين
هم نفس الشباب اللى اتهانوا يوم موقعة الجمل
هم نفس الشباب اللى احتفلوا بسقوط الطاغية مبارك يوم 11 فبراير
هم نفس الشباب اللى مات منهم ما يقرب من 1000 فرد .. دة غير اللى فقد بصره و اللى اتعمى
هم نفس الشباب اللى كانوا على الفيسبوك و تويتر و اتقال عليهم سيس
هم برضه نفس الشباب اللى نزلوا قدام ماسبيرو و اتدهسوا و ماتوا
هم برضه نفس الشباب اللى نزلوا فى محمد محمود و اتعموا و اتقتلوا
هم برضه نفس الشباب اللى نزلوا و اعتصموا قدام المجلس و اتسحلوا و اتضربوا و اتقتلوا
هم برضه نفس الشباب اللى رموا نفسهم جوة النار عشان ينقذوا الكتب من حريق المجمع العلمى
هم نفس الشباب اللى عملوا جنازة مهيبة للشهيد الشيخ عماد عفت
هم نفس الشباب اللى بكوا لاستشهاد علاء عبد الهادى طالب الفرقة الخامسة بكلية طب عين شمس
هم برضه نفس الشباب اللى لسة نفس الناس بيقولوا عليهم قلة مندسة و بلطجية و مأجورين و اجندات خارجية

نفس المجلس العسكرى هو نفس المجلس العسكرى اللى كان مع مبارك من 30 سنة
نفس المجلس العسكرى هو نفس المجلس اللي بيحكم بعد خلع مبارك
هو نفس المجلس اللى مقدرش يقبض على ملثم فجر انابيب الغاز 10 مرات
هو نفس المجلس اللى عنده مخابرات حربية و عسكرية و مباحث و نيابات و مع ذلك فشل يقبض على القلة المندسة و الايادى الخفية فى خلال 11 شهر
هو نفس المجلس اللى دهس الشباب فى ماسبيرو
هو نفس المجلس اللى قتل و فقع عيون ولادنا فى محمد محمود
هو نفس المجلس اللى سحل و ضرب و عرى بناتنا فى القصر العينى
هو نفس المجلس اللى كشف على عذرية البنات فى المتحف المصرى
هو نفس المجلس هارينا تصريحات و معملش شئ يذكر فى 11 شهر
هو نفس المجلس اللى صور الناس بكاميراته و هم بيكسروا و يحرقوا و سابهم و مقبضش عليهم
هو نفس المجلس اللى منع دينا عبد الرحمن من الاعلام لما قالت كلمة حق
هو نفس المجلس اللى رجالته طلعوا على سطوح المبانى و حرقوها و لزقوها فى الشباب
هو نفس المجلس اللى قتل الشهيد الشيخ عماد عفت
هو نفس المجلس اللى قتل علاء عبد الهادى
هو نفس المجلس اللى حاصر جنازته فى الازهر
هو نفس المجلس اللى اقسم بالله انه مضربش ولا طلقة ولا خرطوش على شباب مصر



و لسة نفس الاغبياء مؤيدين لنفس المجلس العسكرى و هو بيقتل نفس الشباب
و حسبى الله و نعم الوكيل

اختلفت او اتفقت مع الشباب او المجلس .. ابتهاجك بترويع المتظاهرين السلميين و اراقة دمائهم عار عليك و سيطاردك حتى ترى ما ابتهجت به فى ذويك يوما ما .. و يحترق قلبك عليهم و تدرك انها لعنة ابتهاجك القديم .. !!
.
.
يسقط يسقط حكم العسكر

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

فيديو السحل الشهير للفتاة المنتقبة