لكم جيلكم ولىَّ جيلِ .. !!

سيدرك الجميع حتما الشبه الواضح بين عنوان التدوينة و الآية الكريمة { لَكُمْ دِينُكُمْ وَلِيَ دِينِ }  (الكافرون 6) .. و قد ينتقدنى البعض على اقتباسى اسلوبا يشبه الآية الكريمة .. لكن شتان الفرق بين كلماته عز و جل فى علاه و بينى العبد الفقير اليه تعالى .. !!
ولكن هذه التدوينة تعبر عما يدور فى مكنون صدرى من كلمات ارغب فى توجيهها لمن يكبروننى سنا و عقلا و ربما وعيا .. و لكنى اخجل احتراما لفارق السن بيننا .. فهى كلمات اوجهها لكل من يطالبنا بالصبر من ابناء جيل الستينات و السبعينات .. جيل والدى و عمى و خالى و اولياء امورنا .. جيل وعى تماما انه يُظلم و يُسرق و يُنهب .. و اكتفى بالسكوت .. فقط بالسكوت و الخنوع .. و اليوم يتهمونا بتخريب مصر .. بعد ان كانت دماءنا هى ثمنا لحريتهم و حريتنا .. !! .. فبأى دين ٍ تدينون .. !!



سامحنى يا كبير السن .. جيلك مش جيلى .. !! .. و دينك مش دينى .. !!


دينكم الخنوع .. الذل .. الاستسلام .. و دة مش دينى .. !!

دينكم تبقى عارف انك بتتسرق و بتتهان .. و راضى .. و دة مش دينى .. !!

دينكم تنكر عليا حقى اقول لأ فى وش اللى ظلمنى .. و دة مش دينى .. !!

دينكم تشوف ولادك بتموت قصاد عينك .. و تقول يستاهلوا .. و دة مش دينى .. !!

دينكم بنت تتعرى و تتسحل و تتهان .. و تشكر اللى سحلها .. و دة مش دينى .. !!

دينكم تشوف بعنيك الصح .. و تبقى عارف انه صح .. تشوهه و تزيفه .. و دة مش دينى .. !! 

دينكم تنكر و تنفى انى انا اللى جبتلك حقك و حريتك .. و دة مش دينى .. !!

دينكم تقولى قبل ما انزل الميدان : يا عيل يا سيس .. و بعد ما انزل الميدان : خربتم البلد .. و لما اموت فى الميدان : بلطجى و يستاهل .. و لما ينجح الميدان : ثورتنا نجحت .. !! .. و دة مش دينى .. !!

دينكم تطلع فى الاعلام تقسم الكحكة على اصحابك بشعرهم الابيض على الكراسى .. و تشتم اصحابى بشعرهم الاسود فى القبور .. و دة مش دينى .. !!

دينكم تسلم للى بايع و اللى دافع عن اللى خان من زمان .. و دة مش دينى .. !!

دينكم تفرش الارض ورد لكل اللى مصالحك معاه .. و اللى يخالفك خاين و عميل .. و دة مش دينى .. !!

دينكم تقول يا شوية عيال مش فاهمين .. مجلسنا مجلس امين .. يا خاينين يا مخربين .. يا قابضين يا ممولين ياللى على الخراب نوايين .. و دة مش دينى .. !!

دينكم تقول اصبر كلها شهرين و ماشيين .. و لو ممشوش على الميدان نازلين .. زى ما نزلنا معاكم زمان .. ولا مش فاكرين .. يا مخربـ ... احم احم .. قصدى يا ولادى يا طيبين .. و دة مش دينى .. !!

دينى اقول للظلم لأ .. اقول للسجن لأ .. اقول للذل لأ .. دينى ما اخوِّنش ... دينى مانكرش .. دينى ماخربش .. دينى اشوف الصح و اشوار عليه .. و الغلط انبهك ليه .. دينى انى بعد مااوصلك للكراسى و تبقى قاعد و راسى .. و تغلط .. اقفلك و احاسبك و افكرك بيه ... دينى مصدقش اللى خان .. دينى مآمنش للى باعنى زمان .. و اللى باعنى فى الميدان و باعنى فى البرلمان بكرة يرمينى فى اللومان .. دينى اطلب حقى و حق اللى شكك فى دينى .. دينى ماصدقكش لما تقولى اصبر و هنزل معاك الميدان .. اومال مين اللى قال عنى سيس و خاين و عميل و جبان .. اومال مين اللى سكت ٣٠ سنة زمان .. سامحنى .. جيلكم مش جيلى .. و دينكم مش دينى .. !!

لكم دينكم و لى دينِ .. !! .. أو كما اردد دائما .. لكم جيلكم ولىَّ جيلِ .. !!

____________________________________________________

ملحوظة : استخدام لفظى "دينى" و "دينكم" لغرض مجازى .. وليس هناك صلة من قريب أو بعيد بالأديان السماوية كافة .. !!